“Əxicəbəl” adlanan ərazi Astara rayonunun Artupa kəndinin şimal hissəsində yerləşir. Bu yer, həmçinin “Axi-cəbəl”, “Əxicbəl” və “Ağjəbel” adlandırılır.
Ərazinin böyük hissəsini tunc dövrünə aid kurqan, digər hissəsini isə orta əsrə aid qəbiristanlıq tutur.
Yerli sakinlərin sözlərinə görə, ərazidə olan kurqanın üzərində qırmızı kərpicdən bir məscid inşa edilib. XVIII əsrdə qacarların Azərbaycana yürüşü zamanı, onların qoşunu Səncərədi kəndinin cənub-şərqində, indiki çay bağının yerində istirahət etmək üçün dayanıb. Onlar yemək bişirmək məqsədi ilə kürə düzəltmək qərarına gəliblər. Kənd sakini Məşədi Əli adlı bir şəxs isə “Əxicəbəl” adlanan ərazidə kərpicdən tikilmiş məscid olduğunu qacarlara xəbər verib. Qacarlar bu xəbəri eşitdikdən sonra həmin məscidi dağıdaraq, onun kərpiclərindən özləri üçün kürə tikiblər.
Deyilənlərə görə, bu ərazidə əvvəllər yeraltı tunel olub. 1990-cı illərdə “Əxicəbəl” adlanan yerdə qazıntı işləri zamanı çox sayda qızıl bəzək əşyaları aşkar edilib.
