Masallıdan olan rəssam “İdman, sən bir dünyasan!” adlı rəsm müsabiqəsində II yerə layiq görülüb. Bu haqda məlumatı Cenublu.az bu gün, 4 mart tarixində Masallı rayon Gənclər və İdman İdarəsinə istinadən verir.
Masallı Dövlət Rəsm Qalereyasının direktor vəzifəsini icra edən Təhmasib Məcidov Gənclər və İdman Nazirliyi və NARGİS jurnalının birgə təskilatçılığı altında 5 mart - Bədən Tərbiyəsi və İdman Gününə həsr edilmiş “İdman həftəsi” çərçivəsində təşkil olunmuş rəsm müsabiqəsində iştirak edib. Rəssam ”Qisas” adlı rəsm əsəri ilə müsabiqədə iştirak edən 20 yaşdan yuxarı rəssamlar arasında II yerə layiq görülərək Gənclər və İdman Nazirliyi tərəfindən Diplom və hədiyyə kuponu ilə mükafatlandırılıb.
Gənclər və İdman Nazirliyi və NARGİS jurnalının birgə təskilatçılığı ilə gənc rəssamların əsərlərinin təqdim olunduğu hərrac və mükafatlandırma mərasimli xeyriyyə xarakterli tədbirdə rəsmlərin satışından əldə olunan vəsait regionlarda idmanın inkişafına sərf olunacaq.
