Yuxarı Nüvədi kəndi Lənkəran rayonunun ərazisində, Lənkəran-Astara şose yolunda, rayon mərkəzindən 13 km cənub-qərbdə, Lənkəran ovalığında yerləşir [1,4].
Kəndin adı talış dilində “Penə Nüədi”dir, yəni “penə” (yuxarı), “nüə” (yeni, təzə), “di” (kənd) hissələrindən düzəlib [1,6]. Toponim “yuxarı təzə kənd” mənasını daşıyır [3]. Müəllim Rzaqulu Rzayevin fikrinə əsasən, kəndin adında olan “yuxarı” sözü yaşayış yerinin digər kəndlərdən yüksək yerdə yerləşməsi ilə bağlıdır [1].
Kənddə bir neçə tarixi memarlıq abidələri mövcuddur: Kinanqala (Kinə ğələ) qalası, Bobokənd piri, XX əsrə aid Yuxarı Nüvədi kənd məscidi və s. [1,2,5]. Yuxarı Nüvədi kəndinin ərazisindən Lənkərançay və Bəşərü çayları axır.
Əhali, əsasən, tərəvəzçilik, çayçılıq, taxılçılıq və heyvandarlıqla məşğuldur.
2017-cu ilin statistik göstəricilərinə əsasən, həmin dövrdə bu kənddə 313 nəfər yaşayıb [1].
Ədəbiyyat:
