Azərbaycanın istənilən guşəsində incəsənətə, o cümlədən teatr sənətinə böyük hörmətlə yanaşılır. Lənkəran rayonu da mədəniyyəti və incəsənəti ilə seçilən bölgələrdən biridir. Səhnə ilə yaşayanlar da həmişə diqqət mərkəzində olur, onlara böyük məhəbbət və qayğı göstərilir. Belə şəxslərdən biri də Lənkəran rayonunun Mamusta kənd sakini, Lənkəran Dövlət Dram Teatrının aktyoru Emin Fərzullayevdir. Cenublu.az-ın əməkdaşı onunla həmsöhbət olub.
Müsahibəni təqdim edirik:
- Emin bəy, özünüz haqqında qısa məlumat verməyinizi istərdim.
- 1983-cü il yanvarın 14-də Lənkəran rayonunun Mamusta kəndində dünyaya göz açmışam. Bakı Mədəni Maarif texnikumunda kulturologiya və bədii yaradıcılıq ixtisası üzrə təhsil almışam. 1999-cu ildən Lənkəran Dövlət Dram Teatrında aktyor kimi çalışıram. Hazırda Lənkəran Dövlət Dram Teatrında bədii quruluş hissə müdiri vəzifəsində fəaliyyət göstərirəm. Bu günə qədər 80-dən çox tamaşalarda oynamışam.
- Necə oldu ki, bu sahəyə marağınız yarandı?
- Aktyor olmaq uşaqlıq arzum idi. 6-cı sinifdə oxuyurdum. Həvəs getdikcə sevgiyə çevrildi. Ən çox da dahi sənətkar rəhmətlik Arif Quliyevin komediyaları məni aktyor olmağa həvəsləndirdi.
- Ailənizdə incəsənətlə məşğul olan var?
- Ailəm və qohumlarım arasında incəsənətlə məşğul olan yoxdur. Təkcə mənim incəsənətə yüksək marağım var.
- Teatrlarda rejissor çatışmazlığı olduğu deyilir. Siz nə düşünürsünüz?
- Bəli, bu gün təəssüf ki, teatrlarda rejissor azlığı müşahidə edilir. Bizim teatrda Anar Babalı, Emil Əsgərov kimi savadlı rejissorlarımız var. Yeni müdirimiz Laləzar xanım da rejissordur.
- Lənkəran Dövlət Dram Teatrında nə kimi problemlər?
- Əvvəllər xeyli problemlərimiz olub. Yeni təyin edilən müdirimiz onların həlli istiqamətində işlər həyata keçirir. İnanırıq ki, bütün problemlərimiz aradan qalxacaq.
- Hazırda teatrınızda aktyor və ya rejissor çatışmazlığı varmı?
- 10 il bundan öncə aktyor və rejissor çatışmazlığından əziyyət çəkirdik. Hazırda hər şey qaydasındadır. Bir çox problemlər öz həllini tapıb.
- Teatrlara maraq, teatrlarımızın indiki səviyyəsi sizi qane edirmi?
- Teatrlara əvvəllər daha çox maraq olub. Sonra bir qədər azaldı. İndi də normaldır. Ali dərəcədə hesab etmirəm. Düşünürəm ki, indi hər şey qaydasına düşür.
- Teatr aktyorları maaşdan şikayətlənirlər. Nə qədər qazanc əldə edirsiniz?
- Qazancımız normaldır. Hər kəsin öz fikri var. Qazanc deyəndə, biz 500-800 manat arası maaş alırıq. Bu da ki, təqribən orta aylıq əmək haqqı qədərdir.
- Lənkəran Dövlət Dram Teatrında nə kimi yeniliklər olacaq?
- Bizdə yenilik çoxdur. Yeniliklərə daima açığıq. Bu günlərdə teatrımızda paralel olaraq 6 tamaşanın məşqi gedir.
Nəzrin Vahid
[URIS id=67173]
