Biləsuvardan olan Xalq artisti Ramiz Novruzun oğlu aktyor Cavidan Novruz ayrıldığı “Komedixana”nın layihə rəhbəri Ənvər Abbasovdan üzr istəyib.
Cenublu.az xəbər verir ki, aktyor bu barədə “Instagram” səhfəsində bildirib. O, atası, mərhum Xalq artisti Ramiz Novruzun səsli müsahibəsinin fonunda Ənvər Abbasovla birgə fotosunu paylaşaraq, qeyd edib:
“Dostlar, bu səs mənim atam, xalq artisti mərhum Ramiz Novruzun səsidir. Ola bilsin ki, atam həmin müsahibəni tamamilə başqa mövzuda verərkən özü də bilməyib ki, bu sözləri ilə mənə bir məsləhət verib. Demək istədiyim budur ki, dostlar, qardaşlar arasında inciklik ola bilər. Amma vacibdir ki, bu inciklik heç vaxt gərəksiz kinə və düşmənçiliyə çevrilməsin. Allaha çox şükür, biz elə insanlar deyilik.
Mərhum dostumuz Azər Baxşəliyevin vəfatından sonra bir şeyi dərk etdim: həyat, həqiqətən, mənasız və boşdur. Bugündən sabaha heç bir zəmanət yoxdur. Hər şeyi mənim çılğınlığıma və səbirsizliyimə buraxın. O vaxt yaşanan incikliyimdə əslində Ənvərin heç bir günahı olmayıb. Çünki o, mənə nədənsə etiraz etmişdi, lakin eyni zamanda uyğun bir alternativ təklif etmişdi. Sadəcə olaraq, mənim əsəbi halım və unutqanlığım səbəbindən bunu nəzərə almadım. Verdiyim müsahibədə nə danışmışdımsa, onu da yayımlayıblar. Orada heç bir montaj olmayıb.
Bu məsələdə yalnız mənim günahım olub, başqa heç kimin. Hadisə bir tərəfli görünürdü, haqq mənim tərəfimdə kimi təsvir edilirdi. Amma Ənvərin də öz mövqeyində haqlı olduğu məqamlar var idi. Buna görə də bu hadisəni sadəcə bir anlaşılmazlıq kimi görürəm. Öz adımdan Ənvəri sevən tamaşaçılardan və hər birinizdən üzr istəyirəm. Sizdən xahiş edirəm ki, bu məsələdə heç kimi qınamayasınız və bu söhbətləri genişləndirib qınaq obyektinə çevirməyəsiniz.
Mən kişi oğluyam. Səhvim varsa, boynuma alıram, üzr istəyirəm və bunu etməyə davam edəcəyəm. Bu mənim vicdanımın tələbidir. İnanın ki, iki dünya bir olsa belə, heç bir aktyor açıq şəkildə belə bir paylaşım etməzdi. Bundan sonra dostluğumuz və qardaşlığımız qaldığı yerdən davam edəcək. Mən 6 il ərzində “Komedixana” layihəsindən evimə çörək aparmışam.
Bir daha tamaşaçılardan və Ənvərdən üzr istəyirəm. Bilirəm ki, Ənvər bu paylaşımıma qəzəblənə bilər, amma vicdanım buna göz yuma bilməzdi. Hamınızı sevirəm”.
Cavidan Novruz bir neçə ay əvvəl verdiyi müsahibədə “Komedixana”dan ayrılma səbəbini izah edib. O, mayın 25-də atasının ad günü olduğunu və həmin gün Akademik Milli Dram Teatrında atası üçün xatirə gecəsi keçirildiyini bildirib. Bu haqda əvvəlcədən xəbərsiz olduğunu, konsert üçün “icazə istəyərkən Komedixana”nın layihə rəhbərinin atası üçün keçiriləcək tədbirdə iştirak etməsinə icazə vermədiyini söyləyib. Cavidan həmin anda hər şeyi bitirdiyini, amma düşmənçiliklə yox, dostluqla ayrıldığını vurğulayıb.
