Cənub bölgələrindən olan, yaşıl biznes sahəsində bilik və bacarıqlarını inkişaf etdirmək istəyən qadın sahibkarlar üçün inkişaf proqramı həyata keçiriləcək.
Cenublu.az xəbər verir ki, Gender Hub Azərbaycan və "Trendyol" Elektron Ticarət Platforması tərəfindən təşkil olunan və BMT-nin Rezident Əlaqələndiricisinin Ofisi tərəfindən dəstəklənən "Qadın Sahibkarlar üçün Yaşıl Biznes və Eko-Liderliyin İnkişafı Proqramı" Cənub bölgələrindən (Lənkəran, Astara, Masallı, Biləsuvar, Lerik, Cəlilabad) olan qadınlara yaşıl sahibkarlıq və dayanıqlılıq mövzusunda praktiki bilik və bacarıqlar qazandırmaq məqsədi daşıyır. İştirakçılar ekoloji cəhətdən təmiz bizneslərin yaradılması və idarə edilməsi barədə məlumat əldə edəcək, iqlim dəyişikliyi ilə mübarizəyə töhfə verən yaşıl təcrübələri öyrənəcəklər.
İnkişaf Proqramı "29 İqlim söhbəti: COP29-a gedən yol" təşəbbüsü çərçivəsində həyata keçirilir.
"Qadın Sahibkarlar üçün Yaşıl Biznes və Eko-Liderliyin İnkişafı Proqramı"nda cənub bölgələrindən olan, yaşıl biznes sahəsində bilik və bacarıqlarını inkişaf etdirmək istəyən qadınlar iştirak edə bilərlər.
Proqram boyunca iştirakçılar yaşıl sahibkarlıq bacarıqları ilə tanış olacaq, yerli və beynəlxalq mütəxəssislərdən biliklər əldə edəcək, praktiki vörkşoplarda iştirak edərək öz icmalarında tətbiq edə biləcəkləri praktiki fəaliyyətləri inkişaf etdirəcəklər.
Proqram iki gün davam edəcək və açılış nitqləri, panel müzakirələri, vörkşoplar və şəbəkələşmə tədbirlərini əhatə edəcək. Hər iki gün iştirak vacibdir. İnkişaf proqramı çərçivəsində iştirakçıların bütün xərcləri (nəqliyyat, yerləşdirmə və qidalanma) təşkilatçı tərəfindən qarşılanır.
Proqramın baş tutacağı tarixlər: 4 - 5 Noyabr
Proqram birinci gün saat 10:45 - 20:00, ikinci gün isə 09:30 - 18:00 aralığında davam edəcək.
Tədbir Lənkəranda, Citrus Valley-da olacaq.
Son qeydiyyat tarixi oktyabrın 30-dur və iştirak ödənişsizdir.
