Torpaq çərşənbəsi kimi tanınan İlaxır çərşənbə Cənub bölgəsində ən təntənəli keçirilən günlərdən biridir. Talışlar İlaxır çərşənbəni “Kulə şəv” adlandırırlar.
Bu çərşənbə günü yer oyanır, torpaq nəfəs alır, əkinə, toxum səpininə hazır olur. Bütün evlərdə bayram süfrələri açılır, cürbəcür yeməklər hazırlanır. İlaxır çərşənbədə hər bir evdə bayram xonçası düzəldilir. Torpaq çərşənbəsində, həmçinin insanlar tonqal qalayırlar. Lakin bu gün qalanan tonqal heç vaxt su ilə söndürülməməlidir.
Adətə görə, axır çərşənbə günü axşam vaxtı qonşuların qapısını pusurlar. Qapıya yaxınlaşarkən eşidilən ilk söz və ya bir neçə söz yaxşı anlamda deyilibsə, bu ildə hər şeyin yaxşı olacağı güman edilir.
