Səfa Fətulla oğlu Axundov 19 iyun 1958-ci ildə Masallı rayonunda anadan olub.
O, 1965-ci ildə Saatlı rayonunda məktəbə gedib, 1966-cı ildə isə Cəlilabadda 2 saylı orta məktəbdə oxumağa başlayıb. O, orta təhsilini 1975-ci ildə Qubadlı rayonunda sona çatdırıb.
Səfa Axundov Bakıdakı aeroportda bir il çalışdıqdan sonra Rusiyanın Orenburq Mülki Aviasiya Məktəbinə daxil olub. O, 1979-cu ildən Bakıda 3 saylı Birləşmiş Aviadəstədə pilot köməkçisi kimi işləyib. Daha sonra Axundov Ukraynanın Kiyev Ali Mülki Təyyarəçilər İnstitutunda qiyabi təhsil alıb. O, 1982-ci ildə Latviyanın Riqa şəhərindəki 39 saylı Orta Texniki Peşə Məktəbində müəllim işləməyə başlayıb. Eyni zamanda Axundov gəmi tərsanəsində mühəndis kimi də çalışıb.
Birinci Qarabağ müharibəsi zamanı Azərbaycanda baş verənləri dünya ictimaiyyətinə çatdırmaq məqsədilə 1988-ci idə Riqada “Dostluq” Azərbaycan Mədəniyyət Cəmiyyəti yaradılan vaxt Səfa Axundov həmin cəmiyyətin ilk sədri seçilib. Axundov 1989-cu ildə Bakıya qayıdaraq Zabrat “Azal-aero” aviaşirkətinin pilotu işləyib. O, Bakı-Ağdam marşrutu ilə uçurdu.
Səfa Axundov 28 yanvar 1992-ci ildə Şuşaya iki uğurlu uçuş edib. Lakin həmin gün üçüncü uçuş edilərkən Xankəndi istiqamətindən atılan raket həmin vertolyotu vurub. Bu vertolyot isə dağa çarpılıb. Nəticədə 3 heyət üzvü və 40 nəfər sərnişin həlak olub. Bu, 20 noyabr 1991-ci ildə Qarakənd yaxınlığında baş verən hadisədən sonra ikinci böyük səma faciəsi idi.
Səfa Axundov 30 yanvar 1992-ci ildə Bakıda Şəhidlər xiyabanında dəfn olunub. O, göstərdiyi şücaətə görə Azərbaycanın Milli Qəhrəmanı adına layiq görülüb.
