Səfa Fətulla oğlu Axundov 19 iyun 1958-ci ildə Masallı rayonunda anadan olub [2].
O, 1965-ci ildə Saatlı rayonunda məktəbə gedib, lakin 1966-cı ildə ailəsinin Cəlilabad rayonuna köçmə səbəbi ilə Axundov buradakı 2 saylı orta məktəbdə oxumağa başlayıb. O, orta təhsilini 1975-ci ildə Qubadlı rayonunda sona çatdırıb.
Səfa Axundov Bakıdakı aeroportda bir il çalışdıqdan sonra Rusiyanın Orenburq Mülki Aviasiya Məktəbinə daxil olub [1]. O, 1979-cu ildən Bakıda 3 saylı Birləşmiş Aviadəstənin AN-2 təyyarəsində pilot köməkçisi kimi işləyib [2]. Sonra isə Axundov Kiyev Ali Mülki Təyyarəçilər İnstitutunda qiyabi təhsil alıb [1]. Pilot 1982-ci ildə Latviyanın Riqa şəhərinə köçüb, 39 saylı Orta Texniki Peşə Məktəbində müəllim işləməyə başlayıb. Eyni zamanda o, gəmi tərsanəsində mühəndis kimi də çalışırdı [2].
Birinci Qarabağ müharibəsi dövründə Azərbaycan reallıqlarını dünya ictimaiyyətinə çatdırmaq üçün 1988-ci ilin noyabr ayında Riqada “Dostluq” Azərbaycan Mədəniyyət Cəmiyyəti yaradılıb. Səfa Axundov həmin cəmiyyətin ilk sədri seçilib. O, bu zaman tez-tez Bakıya gəlib, kütləvi informasiya vasitələrində çıxış edib.
Axundov 1989-cu ildə Bakıya qayıdaraq Zabrat “Azal-aero” aviaşirkətinə məxsus Mİ-8 vertolyotuna 2-ci pilot təyin olunub [2]. O, Bakı-Ağdam marşrutu ilə uçurdu.
Səfa Axundov 28 yanvar 1992-ci ildə Şuşaya iki uğurlu uçuş edib. Lakin həmin gün üçüncü uçuş edilərkən Xankəndi istiqamətindən atılan raket vertolyotu vurub [1]. Həmin anda o, 2000-2200 metr yüksəklikdə idi. Heyət vertolyotu təhlükəsiz yerə - Kərkicahan qəsəbəsi yaxınlığındakı yola endirməyə cəhd göstərdi. Lakin bu mümkün olmadı. İdarə olunmayan vertolyot dağa çarpıldı. 3 heyət üzvü və 40 nəfər sərnişin həlak oldu. Bu, 20 noyabr 1991-ci ildə Qarakənd yaxınlığında baş verən hadisədən sonra ikinci böyük səma faciəsi idi.
30 yanvar 1992-ci ildə Səfa Axundov Bakıda Şəhidlər xiyabanında dəfn olunub. O, göstərdiyi şücaətə görə “Azərbaycanın Milli Qəhrəmanı” adına layiq görülüb [2]. Hazırda Cəlilabad şəhərinin mərkəzində onun büstü mövcuddur, rayon mədəniyyət evi və şəhərin küçələrindən biri onun adını daşıyır [1]. Axundovun təşəbbüsü ilə yaradılan Latviya-Azərbaycan Əlaqələri Cəmiyyətinə onun adı verilib [2].
Ədəbiyyat:
