Novruz bayramı Cənub bölgəsində Yeni ilin gəlişi hesab olunur və çox təntənəli keçirilir.
Bu gün Cənub bölgəsindəki həyətlərdə tonqallar qalanır, insanlar isə onun ətrafına yığışaraq, talış dilində mahnılar oxuyur və şeirlər söyləyirlər. Qadınlar başlarına və bellərinə saçaqlı, rəngli parçalar bağlayaraq, mahnılar ifa edirlər. Həmin gün, həmçinin insanlar Cənub bölgəsində “qurşaqatdı” kimi tanınan “papaqatdı” oynayırlar.
Cənub bölgəsində Novruz bayramı zamanı bişirilən ən tanınmış şirniyyat “qəndi külçə”dir. “Lənkəran külçəsi” və “vulkan külçəsi” kimi tanınan şirniyyat üyüdülmüş qənddən hazırlandığı üçün bu cür adlandırılır.
Novruza xas olan şirniyyatlardan əlavə, süfrənin üzərinə talışların mətbəxinə aid olan təamlar qoyulur. Onlardan biri “tərə xörəyi”dir. Bu yemək yumru düyü ilə göyərtinin qarışığından hazırlanır. Bundan əlavə, talışlar bayram ərəfəsində səməni halvası da bişirirlər. Talışların Novruz bayramı süfrəsində qarpız da olur. Bu, qışdan yaza irəliləyən dövrü əks etdirir.
