“Tərə” xörəyi, əsasən, Azərbaycanın Cənub bölgəsində bişirilir. Yerli əhali bu yeməyi, adətən, yaz və yay aylarında hazırlayır [3].
“Tərə” xörəyi üçün, əsasən, yaz mövsümündə bitən çoştərə, əvəlik, hori toplanılır.
Bitkilər əvvəlcə yuyulur, daha sonra suda qaynadılır. Qazanda qalan həmin kütlə sıxılır ki, bitkilərdə mövcud olan acı su süzülsün. Sıxılmış kütlə, demək olar ki, hər bir talışın evində olan dairəvi formalı “tabaq daşı” ilə döyülüb, əzildikdən sonra yenidən qazana tökülür. Həmin zaman qazana yağ, duz, su, əzilmiş qoz və müəyyən qədər alça qurusu əlavə olunaraq, bişirilir. Bişməsinə az qalmış “Tərə”yə sarımsaq və bir yumurta qarışdırılır.
Yerli əhali “Tərə” yeməyini, adətən, qurudulmuş balıq, soyuq plov və çörəklə yeyir [2]. Bişən yemək süfrəyə qatıqla verilə bilər [3].
Cənub bölgəsində rütubətli iqlim şəraitində çox sayda müxtəlif bitkilər yetişdiyindən burada bitkilərlə hazırlanan yemək növləri çoxdur. Bu yeməklərdən “Səbzi kükü”, “Murğutuş”, “Qoz küküsü”, “Səbzi qovurma”, “Turşukabab” və s. qeyd etmək olar [1].
Ədəbiyyat:
- Həşim Kəlbiyev. Talışların maddi və mənəvi mədəniyyət dəyərləri. Lənkəran-2004.
- İshaq Axundov. Xatirələrimdə yaşayan Lənkəran. Bakı-1989.
- https://evdar.az/recipes/az%C9%99rbaycanin-vitaminli-t%C9%99r%C9%99-yem%C9%99yi/
