Bu gün Novruzun üçüncü çərşənbəsi olan Yel çərşənbəsidir. Həmin çərşənbə “külək oyadan çərşənbə”, “küləkli çərşənbə”, “yelli çərşənbə” kimi də tanınır.
Yel çərşənbəsində əsən soyuq və isti küləklər yazın gəlişindən, Novruzun yaxınlaşmasından xəbər verir. Qədim adətə görə, bu çərşənbə günü qəfəsdə saxlanılan heyvanları azadlığa buraxmaq lazımdır.
Bu gün, adətən, tonqallar qalanır, südlü plov və ya bulğur bişirilir. Süfrələri, əsasən, quru meyvə və dənli bitkilərdən hazırlanmış çərəzlərlə bəzəyirlər. Qadınlar axır çərşənbə üçün hazırlıqlar görür, ev əşyalarını təmizləyir, xalça-palaz çırpır, yorğan-döşəyi havaya verirlər.
Yel çərşənbəsi ilə bağlı bir neçə xalq hikmətləri, atalar sözləri mövcuddur: “Yelnən gələn selnən gedər”, “Yel bağlayanı el açar”, “Külək kimi hərdən bir yana əsmə” və s.
