26 iyun 1918-ci ildə Azərbaycan Xalq Cümhuriyyətinin qərarı ilə Müsəlman korpusu Əlahiddə Azərbaycan korpusu adlandırıldı. Həmin gün Azərbaycanın ilk müntəzəm hərbi hissəsinin yaradılması kimi tarixə düşüb. 1998-ci ildə ümummilli lider Heydər Əliyevin Fərmanı ilə 26 İyun - Azərbaycan Respublikasının Silahlı Qüvvələri Günü elan olunub.
Ordu quruculuğunu gücləndirmək məqsədilə Azərbaycan Xalq Cümhuriyyəti 1 noyabr 1918-ci ildə Hərbi Nazirliyin bərpa edilməsini qərara aldı. Bu quruma ilk vaxtlar Nazirlər Şurasının sədri Fətəli xan Xoyski rəhbərlik edirdi. Nazir müavini isə tam artilleriya generalı lənkəranlı Səməd bəy Mehmandarov təyin edildi və nazirliyin formalaşdırılması ona tapşırıldı. Mehmandarova 25 dekabr 1918-ci ildə hərbi nazir vazifəsi verildi.
Səməd bəy Mehmandarov hərbi nazir olduqdan sonra hərbi xidmətə çağırışı yaxşılaşdırmaq məqsədilə xalqa müraciət etdi. Müraciətdə əvvəllər çağırış işində yol verilən nöqsanlar, hissələrdə əsgərlərə qarşı fiziki güc tətbiq edilməsi və digər halların aradan qaldırılması üçün tədbirlərin həyata keçirilməsinə başlanıldığı bəyan edilirdi.
Milli Ordunun qoşun hissələri 1919-cu ilin avqustundan başlayan Lənkəran əməliyyatında iştirak edərək, ölkənin cənub bölgəsində respublikanın ərazi bütövlüyünü təmin edib.
1920-ci ilin aprelində Azərbaycan Xalq Cümhuriyyətinin süqutu ilə ölkənin müstəqilliyinə və milli mənafelərə xidmət edən ordu hissələri ləğv olundu, maddi-texniki baza isə talan edildi.
Azərbaycan Xalq Cümhuriyyəti ensiklopediyası. I cild. Bakı-2004.
https://web.archive.org/web/20110628151059/http://e-qanun.az/files/framework/data/3/f_3590.htm
http://www.anl.az/down/meqale/rabitadunyasi/rabitadunyasi_iyun2009/84513.htm
