Bu gün Böyük Vətən müharibəsində alman faşizmi üzərində qələbənin 79-cu ildönümüdür. 1941-1945-ci illərdə olan Böyük Vətən müharibəsi sovet xalqının faşist Almaniyası və onun müttəfiqlərinə qarşı aparılan azadlıq mübarizəsidir.
Müharibədə Lənkəran rayonundan 10 min nəfərədək döyüşçü iştirak etmiş, onlardan 7 min nəfər geri qayıtmamışdır. Onların sırasında iki dəfə Sovet İttifaqı Qəhrəmanı Həzi Aslanov, Böyük Vətən müharibəsi qəhrəmanı Baloğlan Abbasov, həmçinin Xan Babayev, Şalı Caniyev, Hüseyn Cavadov, Hüseyn Heydərov, Sayad Hüseynov, Mirkərim Kazımov, Manaf Kələntərli, Kərim Kərimov, Əbülqasım Qasımov, Ələkbər Qurbanov, Bəşir Məmmədov, Məmmədrza Məmmədov, Qədir Möhsümzadə, Kamil Nəcəfov, Ağadadaş Səmədov, Məzahir Vəliyev, Akim Abbasov və digərləri olublar. İkinci Dünya müharibəsi illərində aviasiya döyüşlərində iştirak etmiş lənkəranlı təyyarəçi Qurban Kərimov da var idi [1].
Böyük Vətən müharibəsi zamanı Lənkəran rayonunda iş formaları müharibənin tələblərinə uyğun dəyişdirilmişdir [2]. Lənkəran rayonunun əhalisi əməkçi ümumxalq təşəbbüsünə qoşularaq müdafiə fonduna təkcə 1942-ci ildə 273 qram qızıl, 4162 qram gümüş, 570 min manat pul köçürmüşdür [1]. Bundan əlavə, müharibə dövründə min tonlarla taxıl, ət, yağ və s. məhsullar cəbhəyə göndərilmişdir [2].
İkinci Dünya müharibəsi illərində hərbi hospitallar Lənkəran şəhər 3 və 6 saylı orta məktəblərində yerləşirdi. Həkim Cəbrayıl Əhədov müharibə illərində Lənkəran hərbi hospitalında işləmiş, yaralıları müalicə etmişdir.
Müharibə dövründə Lənkəran rayonunda iki uşaq evi açılmışdır, onlardan biri Şürük kəndində yerləşirdi [1].
İkinci Dünya müharibəsində faşizmə qarşı mübarizədə həlak olmuş lənkəranlıların xatirə kompleksi Heydər Əliyev Xatirə Parkında 1975-ci ildə ucaldılıb [1,3]. Bu abidə kompleksi Böyük Vətən müharibəsində həlak olanların xatirəsinə qoyulmuş ən böyük abidələrdən biri sayılır [3].
Ədəbiyyat:
