Azərbaycanda 2025-ci ilin iyul ayında bəzi ərzaq və qeyri-ərzaq məhsulları, eləcə də ödənişli xidmətlərin qiymətlərində dəyişiklik müşahidə olunub.
Cenublu.az xəbər verir ki, Dövlət Statistika Komitəsinin məlumatına görə, iyulda əvvəlki ayla müqayisədə ərzaq məhsullarından bahalaşma əsasən uzun düyü, mal və qoyun əti, kolbasa, günəbaxan və qarğıdalı yağı, limon, albalı, gilas, ərik, göyərti və şokolad məmulatlarında qeydə alınıb.
Ucuzlaşma isə yumurta, banan, alma, armud, gavalı, şaftalı, qarpız, yemiş, üzüm, ağ kələm, xiyar, pomidor, şirin bibər, badımcan, lobya, çuğundur, yerkökü, soğan və kartofun qiymətlərində müşahidə edilib.
Qeyri-ərzaq məhsulları üzrə qiymətlər indeksi iyul ayında əvvəlki aya nisbətən 100.1%, yanvar–iyulda isə ötən ilin eyni dövrü ilə müqayisədə 102.6% təşkil edib. Bahalaşma yuyucu vasitələr və şəxsi gigiyena məhsullarında, ucuzlaşma isə parket, ortopedik döşəklər və yazı kağızlarında qeydə alınıb.
Ödənişli xidmətlər üzrə qiymət indeksi iyulda 100.4%, 7 aylıq göstərici isə 107.3% olub. Bahalaşma stomatoloji xidmətlər, MDB-dən başqa ölkələrə hava nəqliyyatı, istirahət turları və mehmanxanaların gecələmə xidmətlərində, ucuzlaşma isə MDB ölkələrinə hava nəqliyyatı ilə sərnişindaşıma xidmətlərində müşahidə olunub.
