Təngərud kəndi Astara şəhərindən təxminən 20 km şimal-qərbdə yerləşir.
Təngərud kəndinin yaranmasını orta əsrlərə aid edirlər, lakin bu ərazidə artıq tunc dövründən insanlar yaşamağa başlamışdılar. Bu səbəbdən kənd Astara rayonunun ən qədim insan məskənlərindən biri hesab edilir [5].
Kəndin adı talış dilindən tərcümədə “təngə” (dar dərə), “ə” (birləşdirici sait) və “ru, rud” (çay), yəni “dar dərə çayı” mənasını verir [4].
Bu kənd bir neçə məhəllədən ibarətdir: Kəndiçi, Aşağı, Əmu, Penəsu, Üçkünc və s [5].
Burada tunc dövrünə aid Baba Cəbbar və Təngərud kurqanları, orta əsrlərə aid edilən Yekdəst qalasının qalıqları və Baba Cəbrayıl türbəsi, 1900-cü illərdə inşa edilən 2 ləm və s. tarixi abidələr yerləşir [3].
1920-ci illərdə Astara rayonunda olan arxeoloq İsa Əzimbəyovun məlumatına görə, bu kəndə yaxın olan ərazidə Malikan qala (Padşahlar qalası) və Molavand qala (Mal-qara qalası) yerləşib. Bundan əlavə, Təngərud kəndində müxtəlif fiqurlar olan qədim qəbiristanlıq və 4 kurqan var idi. 1921-ci ildə kənd sakini burada Sultan Əhmədin adı olan gümüş sikkələrlə dolu saxsı qab tapıb. Onlardan birini Əzimbəyov Azərbaycan Arxeologiya Komitəsinə təqdim edib [2].
Tarixçi Mirzə Əhməd Mirzə Xudaverdi оğlu tərəfindən 1882-1883-cü illərdə yazılan “Əxbarnamə” əsərində bu kənd haqqında məlumat verilib [6].
1915-ci ilə aid olan məlumata görə, Təngərud kəndində 987 nəfər yaşayırdı [1]. 2009-cu ilin statistik göstəricilərinə əsasən, bu kənddə 3557 nəfər yaşayıb [7].
Ədəbiyyat:
