Qoşatəpə abidəsi Cəlilabad rayonunun Uzuntəpə kəndi ərazisindən 2 km şimal-qərb istiqamətində yerləşir [1,2]. Abidə iki təpədən - kurqandan və yaşayış yerindən ibarət olub.
Qoşatəpə abidəsinin sahəsi 3 hektara qədər ərazini əhatə edib. Burada tapılan məişət əşyalarının qırıntıları, təndir yerləri, kərpiclər insanların burada yaşamasını sübut edib. Yaşayış yerinin dağıdılmış hissəsində qırmızı rəngli yanmış təndir və ya ocaq izləri mövcuddur. Təsərrüfat quyularının izləri, heyvan və insan sümüklərinin qalıqları bu ərazinin qədim və orta əsr yaşayış sahəsi olmasından xəbər verir.
2009-cı ildə buraya dəvət olunmuş Azərbaycan Milli Elmlər Akademiyasının (AMEA) Arxeologiya və Etnoqrafiya institutunun əməkdaşı, professor Tufan Axundov ərazinin əhəmiyyətli tarixi təpə və kurqan olduğunu qeyd etmişdir [1].
2011-ci ildə Qoşatəpə ərazisində torpaq işləri zamanı dəfinə aşkar olunub [2]. Təsərrüfat küpünün içərisində çoxlu sayda mis sikkələr var idi. Lakin torpaq işləri aparılan vaxt sikkələrin əksəriyyəti zədələnmişdir. Dəfinədə əldə olunan 273 ədəd mis sikkə tədqiq olunmaq üçün AMEA-nın Arxeologiya və Etnoqrafiya İnstitutuna təqdim edilmişdir. Orada sikkələr kimya elmləri namizədi Rauf Quliyev tərəfindən kimyəvi üsullarla təmizlənmiş və numizmat alim Əli Rəcəbli tərəfindən tədqiq edilmişdir. Tədqiqatın nəticəsinə görə, mis dinar (dirhəm) və fəlslərdən ibarət olan sikkələr XII əsrə aiddir. Rəcəblinin fikrinə görə, qədim mis pullar Səlcuq sultanı Sultan Arslan şahın (1161-1176) adından kəsilmişdir. Tədqiqat işləri başa çatdırıldıqdan sonra dəfinə 2016-cı ildə nümayiş etdirilmək üçün Cəlilabad Tarix Diyarşünaslıq muzeyinə təhvil verilib [1].
Hazırda Qoşatəpə abidəsinin bir çox hissələri dağılmış vəziyyətdədir, digər hissəsi isə əkin sahəsi kimi istifadə edilir [2].
Ədəbiyyat:
