Bu gün iki dəfə Sovet İttifaqı Qəhrəmanı olmuş general-mayor Həzi Aslanovun doğum günüdür.
O, 1910-cu il yanvarın 22-də Lənkəran şəhərində anadan olub.
İbtidai təhsilini şəhər 1 saylı orta məktəbində alıb. Leninqrad süvari məktəbində təhsildən sonra Kotovski adına III Bessarabiya süvari diviziyasında taqım komandiri kimi fəaliyyətə başlayıb.
İkinci Dünya müharibəsi başlananda o, Ukraynada xidmət edirdi.
1944-cü ildə Aslanovun 35-ci qvardiya tank briqadası Belorusiyanı, Pribaltika respublikalarını azad etmək uğrundakı döyüşlərdə xüsusilə fərqlənib. 1945–ci il yanvarın 24-də Həzi Aslanov Latviyanın Liepay rayonunda alman faşistləri ilə döyüşdə qəhrəmancasına həlak olub. Həzi Aslanovun qəbri Bakıda Şəhidlər xiyabanındadır.
Həzi Aslanov Böyük Vətən müharibəsi cəbhələrində göstərdiyi şəxsi igidlik və qoçaqlığına görə 3 “Qırmızı bayraq” ordeni, 2-ci dərəcəli Suvorov ordeni, Aleksandr Nevski ordeni, 1-ci dərəcəli Vətən müharibəsi ordeni, 2 “Qırmızı ulduz” ordeni və medallarla təltif olunub.
1944-cü ildə general-mayor H.Aslanov Belorusiya cəbhəsindəki şücaətinə görə ikinci dəfə yüksək ada təqdim edilsə də, SSRİ hərbi rəhbərliyində təmsil olunan erməni generalı İ.Baqramyan buna maneçilik törədib. Bu ədalətsizlik ölümündən 47 il sonra, 1991-ci ildə ona ikinci dəfə Sovet İttifaqı Qəhrəmanı adı verilməklə aradan qalxıb.
View this post on Instagram
