Qida Təhlükəsizliyi Agentliyi (AQTA) tərəfindən Neftçala rayonunda fəaliyyət göstərən kənd təsərrüfatı məhsulları bazarında plandankənar yoxlama aparılıb.
Cenublu.az xəbər verir ki, yoxlama zamanı qida təhlükəsizliyi və sanitariya-gigiyena tələblərinin kobud şəkildə pozulduğu müəyyən edilib. Satışa çıxarılan qida məhsullarına dair müvafiq müşayiətedici sənədlər təqdim olunmayıb, bəzi məhsulların üzərində etiket məlumatları olmayıb.
Həmçinin balıq və süd məhsullarının soyuducudan kənarda, açıq şəkildə satışa çıxarıldığı aşkarlanıb. Bazarda mal qonşuluğu qaydalarının və tez xarab olan məhsulların saxlanma tələblərinin pozulduğu da müəyyən edilib.
Faktla bağlı sahibkar barəsində İnzibati Xətalar Məcəlləsinin müvafiq maddələri üzrə inzibati protokol tərtib olunub. Süd və süd məhsullarının satışının dayandırılması barədə qərar qəbul edilib, nöqsanların aradan qaldırılması üçün icrası məcburi göstərişlər verilib.
