Lənkəran rayonunun Şağlaküçə kəndindəki şəhid Mail Əzizovun adını daşıyan küçənin yolları keçilməz vəziyyətdədir. Bu haqda məlumatı Cenublu.az bu gün, 28 fevral tarixində verir.
Belə ki, sakinlər il boyu çirkab suların üfunətində yaşayırlar. Səbəb isə küçədə kanalizasiya sisteminin olmaması və yol örtüyündə dərin dəliklərin yaranmasıdır.
“Bu yola nə ayaq, nə ayaqqabı, nə avtomobil dözür. Taksi sürücüləri küçəyə girmirlər. Lənkəran yağışlı şəhərdir. Cuzi yağış yağan kimi küçə bu vəziyyətdə olur. Yolumuz bərbad, kanalizasiya sistemimiz yox. Aidiyyəti qurumlardan xahiş edirik, problemimizi həll etsinlər”, - deyə sakinlər bildiriblər.
Qeyd edək ki, Cenublu.az daha öncə şəhid Kənan Axundovun, şəhid Orxan Quluzadənin, şəhid Rəşid Məmmədovun, şəhid Samir Quliyevin, şəhid Mirxəyal Kərimzadənin, şəhid Yalçın Həsənovun adlarını daşıyan küçələrin baxımsız halda olması haqda məlumat verib.
