Yardımlıda qohum və erkən nikahlara qarşı mübarizə məqsədilə tədbir keçirilib.
Cənublu.az xəbər verir ki, “Erkən və qohumlar arasında nikahların qarşısının alınması” layihəsi Din və Qadın Hüquqları İctimai Birliyi, Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirilir.
Layihə çərçivəsində Astara, Cəlilabad, Yardımlı, Biləsuvar, Masallı və Lənkəran rayonlarında maarifləndirici tədbirlər təşkil ediləcək. Hər rayonda 20 nəfər olmaqla, ümumilikdə 120 nəfərin iştirakı planlaşdırılır.
Layihə çərçivəsində 6 Dəyirmi Masa və seminar-treninq keçiriləcək. Tədbirlərdə hədəf qrupları, yerli icra hakimiyyəti, bələdiyyələr, dini icmalar, təhsil işçiləri və digər müvafiq orqanlar iştirak edəcək.
Tədbir zamanı iştirakçılara Ailə Məcəlləsi, “Məişət zorakılığının qarşısının alınması haqqında Qanun” və digər normativ aktlar haqqında məlumat veriləcək, erkən nikah problemləri və onların həlli yolları müzakirə ediləcək.
Qeyd edək ki, Ailə Məcəlləsinə əlavə olunması nəzərdə tutulan yeni norma ilə qardaşlar, əmi (dayı) və qardaş (bacı) qızları, həmçinin bibi (xala) və qardaş (bacı) oğulları arasında nikahın bağlanmasına məhdudiyyət qoyulması təklif edilib.
