Bu gün Xalq artistimiz Bilal Əliyevin anadan olduğu gündür.
Bilal Şahşirin oğlu Əliyev 1959-cu il noyabrın 18-də Salyan rayonunun Kürqaraqaşlı kəndində anadan olub.
Bilal Əliyev 1982-ci ildə A.Zeynallı adına Musiqi Texnikumunun Xanəndəlik fakültəsinə daxil olub, 1986-cı ildə texnikumu müvəffəqiyyətlə bitirib. Əmək fəaliyyətinə həmin ildən R.Behbudov adına Azərbaycan Dövlət Mahnı Teatrında vokalçı vəzifəsi ilə başlayıb. 1990-cı ildən 1993-cü ilədək "Tərəqqi" mühəndis-kompüter mərkəzində, "İlkin" studiyasında vokalçı vəzifəsində çalışıb. 1993-cü ildən R.Behbudov adına Azərbaycan Dövlət Mahnı Teatrında vokalçı kimi fəaliyyət göstərir.
Azərbaycan Dövlət Mədəniyyət və İncəsənət Universitetini bitirib.
2000-ci ilin oktyabr ayında Azərbaycan Respublikası Prezidentinin fərmanı ilə Əməkdar artist fəxri adına layiq görülüb.
O, 2009-cu ildə Azərbaycan Respublikasının Xalq artisti fəxri adına layiq görülüb.