Cəlilabad Rayon Mərkəzi Xəstəxanasının Həkim Məsləhət Komissiyasının sabiq sədri Könül Əliyeva və tibb məntəqəsinin keçmiş müdiri İltizam Əzimovun rüşvət ittihamı ilə bağlı məhkəmə araşdırmasında yeni detallar məlum olub.
Lənkəran Ağır Cinayətlər Məhkəməsində keçirilən iclasda bildirilib ki, İltizam Əzimov əlillik dərəcələrinin təyin edilməsi üçün vətəndaşlardan 58 min manat alaraq Könül Əliyevaya verib. Lakin sonuncu vəd edilən işi həll etmədiyindən Əzimov ondan aidiyyəti orqanlara şikayət edib.
Məhkəmədə qeyd olunub ki, alınan pullar vətəndaşlara geri qaytarılıb və onlar şikayətçi olmayıblar. Bununla belə, rüşvət müqabilində sosial müavinət alan şəxslərin ödənişləri dayandırılıb, Dövlət Sosial Müdafiə Fondu isə əvvəl ödənilən məbləğləri geri tələb edir.
İttihama görə, Könül Əliyeva İltizam Əzimovun köməkliyi ilə saxta məlumatları elektron sistemə yerləşdirərək təkrar rüşvət alıb və dövlətə maddi ziyan vurub.
Hər iki şəxs əvvəlcə polisin nəzarəti altına verilsə də, sonradan dövlət ittihamçısının vəsatəti əsasında həbs olunublar. Növbəti məhkəmə iclası dekabrın 1-nə təyin edilib.
Mənbə: report.аz