Masallıda Viləş çayına cəkikimi balıqlardan çəki, enlialın və ağ amur növlərindən olan balıq körpələri buraxılıb. Bu haqda bu gün, 22 fevral tarixində Cenublu.az Report.az-a istinadən xəbər verir.
Tədbir Ekologiya və Təbii Sərvətlər Nazirliyinin Bioloji Müxtəlifliyin Qorunması Xidmətinin, Daxili İşlər Nazirliyinin su polisi bölməsi əməkdaşlarının və Masallı Asan Xidmət nümayəndələrinin iştirakı ilə baş tutub.
Viləş çayına buraxılan 87 min balıq körpəsi ETSN-nin Kiçik Qızılağac Balıqartırma təsərrüfatında yetişdirilib.
ETSN-nin Bioloji Müxtəlifliyin Qorunması Xidmətinin rəisi Firudin Əliyevin sözlərinə görə, məqsəd su hövzələrində balıqların təbii populyasiyasına imkan yaratmaqdır: "Ötən il bu məqsədlə 5 milyon 500 min balıq körpəsi təbii su hövzələrinə buraxılıb. Bu il bu rəqəmin 6 milyona çatdırılması nəzərdə tutulub. Bu kimi tendensiyaların işğaldan azad olmuş ərazilərdə də həyata keçirilməsi nəzərdə tutulub. Balıqların Viləş çayının bu hissəsində suya buraxılması da təsadüfi deyil. 10-20 qram arasında çəkiləri olan balıq körpələri bir müddət burada adaptasiya dövrünü yaşadıqdan sonra dənizə çıxır. Bu da görülən işin effektliyini artırır".
O vurğulayıb ki, bu tədbir brakonyerliklə, qanunsuz ovla məşğul olan şəxslərə də bir mesajdır: "Bu istiqamətdə də aidiyyəti qurumlar qanun pozucularına qarşı ciddi tədbirlər görür".
