2024-cü il aprelin 12-də Cəlilabad rayonunun Göytəpə şəhərində baş verən dava ağır cinayət işi ilə nəticələnib. 2001-ci il təvəllüdlü Məhəmmədəli Nurullayev tanışı Maisə xəsarət yetirməkdə ittiham olunub.
Hadisə avtovağzal ərazisinin arxa hissəsində baş verib. İttihama görə, Məhəmmədəli şəxsi münasibətlər zəminində yaranan mübahisə zamanı Maisin üz nahiyəsinə bir neçə dəfə yumruq zərbəsi endirib. Nəticədə zərərçəkmiş ağır xəsarət alıb və xəstəxanaya yerləşdirilib.
Məhəmmədəli isə özünü təqsirli bilməyib. O deyib ki, Mais içkili vəziyyətdə olub və salto vurmaq istəyərkən yıxılaraq xəsarət alıb. Onun sözlərinə görə, aralarında ciddi dava olmayıb.
Zərərçəkmiş Mais isə tam fərqli ifadə verib. O deyib ki, hadisə zamanı içkili olmayıb və salto vurmaq istəməyib. Məhəmmədəlinin qəfil hücum edərək ona iki zərbə vurduğunu, bundan sonra huşunu itirdiyini bildirib. Mais əlavə edib ki, Məhəmmədəlinin ailəsi sonradan ona maddi yardım göstərib.
Cinayət işi Lənkəran Ağır Cinayətlər Məhkəməsində araşdırılıb. Məhkəmə Məhəmmədəli Nurullayevi Cinayət Məcəlləsinin müvafiq maddəsi ilə təqsirli bilərək 6 il müddətinə azadlıqdan məhrum edib.
