Vətən müharibəsində iştirak edərək, qəhrəmancasına şəhid olanlardan biri də Taleh İsmayılovdur.
AzEdu Təhsil Portalı olaraq qəhrəman şəhidimizin övladları ilə həmsöhbət olub.
- Murad, dərslərini necə oxuyursan? Ən çox hansı fənni yaxşı mənimsəyirsən?
- Dərslərimi yaxşı oxuyuram. Əsasən tarix fənnində daha yaxşı olduğumu söyləyə bilərəm. Hətta fənn olimpiyadalarında da iştirak edirəm.
- Təhsil həyatınla bağlı hansı hədəflərin var?
- Bakalavr pilləsi üzrə ali təhsili adlıqdan sonra magistraturaya qəbul olub təhsilimi hüquq üzrə davam etdirmək istəyirəm.
- Bəs magistratura təhsilini Qarabağ Universitetində almağı düşünürsənmi?
- Əlbəttə, istərəm. Atamın xidmət edib şəhidlik zirvəsinə ucaldığı ərazidə təhsil almaq mənə şərəfdir. Çünki Qarabağ torpağı mənə doğmadır.
- Murad, çox istərdik ki, atanla bağlı yadda qalan bir xatirənizi bizimlə bölüşəsən...
- Birinci sinifdə sinif yoldaşlarımı dərsə valideynləri, əsasən də ataları gətirirdi. Mənim atam hərbi xidmətdə olduğu üçün gələ bilməmişdi. Bir müddət sonra atamla əlaqə saxladım və sinif yoldaşlarımı dərsə atalarının aparıb-gətirdiyini, onun isə mənim dalımca gələ bilmədiyini dedim. Bu sözdən sonra atam mənə dedi ki, gələn dəfə gəlib səni özüm dərsə aparacam. Bu söhbətin üstündən bir həftə keçdi. Atam mənə telefonda verdiyi sözünü tutdu. Mənimlə birgə dərsə gəldi, hətta əyləşdik və fotomuzu da çəkdi. Bu hadisəni heç zaman unutmaram.
- 44 günlük Vətən müharibəsindəki qələbədən əvvəl atam evə bir bayraq gətirdi. Bayrağı mənə təqdim elədi və dedi: “bayrağı sənə əmanət edirəm, onu qoru. Vətənimizin bütün torpaqları işğaldan azad edildikdən sonra bu bayrağı səninlə birgə Şuşada dalğalandırarıq.
Xatırladaq ki, Taleh İsmayılov 1986-ci ildə noyabrın 26-da Lənkəran rayonunun Boladı kəndində anadan olub.
Vətən müharibəsi zamanı Füzulinin, Cəbrayılın, Qubadlının, Xocavəndin və Ağdam rayonlarının azadlığı uğrunda gedən döyüşlərdə savaşıb. 44 günlük Vətən müharibəsinin 39 gününü döyüşlərdə iştirak edən Taleh İsmayılov Şuşanın azadlığı uğrunda gedən döyüşlər zamanı noyabrın 4-ü qəhrəmancasına şəhid olub.
