Astara rayon icra hakimiyyətinin başçısı Qəzənfər Ağayev əhali ilə növbəti səyyar qəbul-görüşü Siyaku kənd inzibati ərazi dairəsi üzrə nümayəndəliyinin Şağlazüzə kəndində keçirib. Bu haqda məlumatı Cenublu.az bu gün, 19 oktyabr tarixində verir.
Görüşdə rayonun inzibati orqanlarının, idarə və müəssisələrinin rəhbərləri iştirak ediblər.
İcra başçısı bildirib ki, son illər nümayəndəliyin ərazisində böyük işlər görülüb. Siyaku, Vaqo, Rinə, Marzəsə kəndlərində müasir tipli məktəb binaları tikilib, əsas yollar asfaltlanıb, qazlaşma aparılıb, sahilbərkitmə işləri, elektrik xətt təsərrüfatında təmir işləri görülüb. Aqrar sahə, xüsusən sitrusçuluq inkişaf edərək ildən-ilə genişlənir. Müasir üsullarla yeni sitrus bağlarının salınması nəticəsində bol məhsul əldə edilir.
Son günlər yağan aramsız yağışlar rayonumuzun yaşayış məntəqələrində, o cümlədən Siyaku nümayəndəliyi ərazisində müəyyən fəsadlar törədib. Pensərçayda sel-suları bir neçə körpünü zədələyib, bəzilərini tamamilə sıradan çıxarıb. Həmin ərazilərdə alternativ yollar salınmaqla, hazırda körpülərin bərpası istiqamətində işlər görülür.
Kənd sakinləri çıxış edərək Şağlazüzə kənd tam orta məktəbi üçün əlavə sinif otaqlarının tikilməsinə, kəndə əlavə telefon nömrələrinin verilməsi və internet şəbəkəsinin çəkilməsinə, elektrik xətt təsərrüfatının yenilənməsinə, ərazidə yanğınsöndürmə və təcili tibbi yardım məntəqələrinin yaradılmasına köməklik göstərilməsini xahiş ediblər.
İcra başçısı vaxt tələb edən məsələlər barədə izahatlar verib, digərlərinin həlli ilə əlaqədar təsərrüfat və xidmət sahələrinin rəhbərlərinə tapşırıqlar verib.
