Astara rayon İcra Hakimiyyətinin başçısı Qəzənfər Ağayev Pəlikəş kənd inzibati ərazi dairəsi üzrə nümayəndəliyinə daxil olan Dolu kəndində səyyar qəbul-görüş keçirib. Bu haqda məlumatı Cenublu.az bu gün, 4 iyul tarixində verir.
İcra başçısı bildirib ki, kənd mürəkkəb relyefə malik ərazidə yerləşdiyindən uzun illər yol, işıq, məktəb problemləri olub. Cənab Prezidentin sərəncamları ilə ayrılan vəsait hesabına bu kəndlə yanaşı, Şəvqo, Sibiyyət, Diqo, Avyarud kəndlərinə də avtomobil yolu və elektrik xətti çəkilib, üç kənddə ibtidai məktəblər üçün modul tipli binalar quraşdırılıb. Həmçinin Dolu–Reqloba yolu da istifadəyə verilib. Bu yol strateji bir yoldur. Pəlikəş, Hamoşam və Asxanakəran ərazi nümayəndəliklərini birləşdirməklə, Toradi–Pensər yoluna alternativ istifadə olunan bu dairəvi yol sərhəddə keşik çəkən hərbçilərimizin işinin asanlaşdırılması baxımından da əhəmiyyətlidir.
Kənd sakinləri Dolu kənd ibtidai məktəbin ümumi orta məktəbə keçirilməsinə, kəndə çəkilən yeni yoldan bir neçə sakilərin evlərinə qədər olan hissənin hamarlanmasına köməklik göstərilməsini xahiş ediblər.
İcra başçısı vətəndaşlar tərəfindən verilən təkliflərə münasibət bildirib, həlli barədə tapşırıqlarını verib.
Yeni salınmış Dolu–Reqloba yoluna, Şeyx Nəsrullah ziyarətgahına gedən yolda salınan körpüyə baxış keçirən icra başçısı ziyarətgahda aparılan abadlıq işləri ilə tanış olub, eyni zamanda Şəvqo kəndinə gedən yolun genişləndirilməsi barədə tövsiyə və tapşırıqlarını verib.
