Cəlilabaddan olan Xalq artisti Qabil Quliyevin səhnə fəaliyyətinin 50 illiyi münasibətilə Bakı şəhərində tədbir keçirilib. Bu haqda məlumatı Cenublu.az bu gün, 21 oktyabr tarixində verir.
“Yarım əsrlik sənət yolum” adlı tədbir C.Cabbarlı adına Azərbaycan Dövlət Teatr Muzeyində baş tutub. Burada Əməkdar mədəniyyət işçisi Sevinc Mikayılova, xalq artistləri Hacı İsmayılov, Nurəddin Mehdixanlı, Əli Nur, incəsənət xadimi, teatrşünas professor Aydın Talıbzadə, Muzey Sərvətləri və Xatirə Əşyalarının Elmi Bərpa Mərkəzinin direktoru Zərifə Məlikova, Lənkəran Dövlət Dram Teatrının direktoru İntiqam Hacılı, teatrın baş rejissoru Anar Babalı və ailə üzvləri iştirak ediblər.
Tədbir çərçivəsində aktyorun həyat və yaradıcılığını əks etdirən eksponatlardan hazırlanmış videoçarx, oynadığı tamaşa və filmlərdən kadrlar təqdim olunub. Həmçinin Opera və Balet Teatrının solisti xanəndə Mütəllim Dəmirov və Azərbaycan Milli Konservatoriyası nəzdində Asəf Zeynallı adına Musiqi Kollecinin və İncəsənət Gimnaziyasının tələbələri sənətkarın şərəfinə konsert proqramı ilə çıxış ediblər.
