Masallı Rayon Polis Şöbəsinin əməkdaşları Milli Qəhrəman Səfəralı Məmmədovun anadan olmasının 60-cı ildönümü münasibətilə onun büstünü ziyarət ediblər. Bu haqda məlumatı Cenublu.az bu gün, 16 oktyabr tarixində verir.
Polis əməkdaşları Səfəralı Məmmədovun həyat və döyüş yolunun hər bir gənc polis əməkdaşı, eləcə də Azərbaycan gənci üçün örnək olduğunu, Milli Qəhrəmanın əziz xatirəsinin daim ehtiramla xatırlanacağını bildiriblər. Çıxış edənlər bu gün Səfəralı Məmmədovun ruhunun şad olduğunu, uğrunda döyüşərək canını fəda etdiyi Vətən torpaqlarının artıq işğaldan azad olunduğunu və həmin torpaqlarda Müzəffər Ali Baş Komandan İlham Əliyev tərəfindən şanlı bayrağımızın ucaldıldığını bildiriblər.
Qeyd edək ki, Səfəralı Məmmədov Daxili işlər orqanlarında xidmət edib. O, 16 fevral 1992-ci ildə Xocavənd rayonunun Qaradağlı kənd sakinlərini azğınlaşmış erməni dəstələrindən xilas edən zaman döyüşərək şəhid olub. S.Məmmədov ölümündən sonra “Azərbaycanın Milli Qəhrəmanı” adına layiq görülüb. Masallı şəhərindəki küçələrdən birinə, cəsur döyüşçünün təhsil aldığı məktəbə onun adı verilib. Oxuduğu məktəbin həyətində büstü qoyulub, qəhrəmana həsr olunmuş “Qəhrəman polis” adlı sənədli film çəkilib.
