Masallıda gəncləri maarifləndirmək məqsədilə görüş keçirilib. Bu haqda bu gün, 23 fevral tarixində Cenublu.az DİN-ə istinadən xəbər verir.
Tədbir Masallı Rayon Polis Şöbəsinin təşkilatçılığı ilə Hüseynhacılı kənd tam orta məktəbində “Narkomaniyaya və erkən nikahlara yox deyək!” mövzusunda təşkil olunub. Çıxış edən Masallı RPŞ-nin rəisi, polis polkovniki Azay Ağayev ümumbəşəri bəla olan narkomaniyanın fəsadlarından, onun insan həyatında buraxdığı acı izlərdən konkret misallardan nümunə gətirməklə danışıb, bu bəladan qurtulmaq üçün hər kəsin üzərinə mənəvi məsuliyyət düşdüyünü bildirib. Bu istiqamətdə maarifləndirmə işinin cəmiyyətin bütün sosial institutları tərəfindən mütəmadi olaraq aparılmalı olduğuna diqqət çəkib.
Daxili işlər orqanlarının əməkdaşlarının mütəmadi olaraq təhsil müəssisələrində və digər kollektivlər qarşısında keçirdiyi maarifləndirici tədbirlərin məqsədi də məhz yeniyetmə və gəncləri narkomaniya və digər zərərli vərdişlərdən qorumaq, gənc nəslin savadlı, vətənpərvər ruhda böyüməsi, sağlam inkişaf etməsi istiqamətində işlərə töhfə verməkdir.
Sonra çıxış edən Masallı RİH başçısının müavini Aybəniz Qafarova və digərləri narkomaniya və erkən nikahların mənfi nəticələri barədə məktəblilərə məlumat veriblər, onları zərərli vərdişlərdən uzaq olmağa, təhsilə və sağlam həyat tərzinə daha həvəslə yanaşmağa çağırıblar.
