Lənkəranda gənclərə zərərli verdişlərin nəticələri haqda məlumatlar verilib. Bu haqda bu gün, 22 fevral tarixində Cenublu.az Lənkəran Şəhər Gənclər və İdman İdarəsinə istinadən xəbər verir.
"Narkomaniyanın insanların həyat və sağlamlığına zərərli nəticələri" mövzusunda keçirilən tədbir Lənkəran Şəhər Gənclər və İdman İdarəsi və Lənkəran Şəhər Rayon Polis Şöbəsinin birgə təşkilatçılığı ilə Lənkəran rayonu Q.Zeynalov adına Darquba kənd tam orta məktəbində baş tutub.
Tədbirdə Lənkəran Şəhər Gənclər və İdman İdarəsinin nümayəndəsi Yusif Xamiyev, Lənkəran Şəhər Rayon Polis Şöbəsinin şəxsi heyətlə iş üzrə rəis köməkçisi, polis polkovnik-leytenantı Anar Həbibzadə, ŞRPŞ-nin yetkinlik yaşına çatmayanlar üzrə baş inspektoru, polis mayoru Fazil Bağırov, polis baş leytenantı Tahir Gənciyev və məktəbin direktoru Mais Kazımov, məktəbin VIII-XI sinif şagirdləri və bir qrup müəllimlər iştirak ediblər.
Çıxışlarda bir daha diqqətə çatdırılıb ki, gələcəkdə xalqı, vətəni üçün gərəkli övlad olmaq istəyən bu günün gənci ilk növbədə zərərli vərdişlərdən, o cümlədən narkomaniyadan uzaq olmalıdır.
Dövlət başçısı İlham Əliyev hər zaman bildirir ki, ölkə əhalisinin sağlamlığı prioritet məsələlərdəndir. Gənclər idman məşqlərində və kütləvi idman tədbirlərində iştirak etməyə dəvət ediliblər.
Sonda tədbirdə iştirak edənlərə narkomaniyanın törətdiyi fəsadları özündə əks etdirn videoçarx nümayiş etdirilib və iştirakçıları maraqlandıran suallar dolğun şəkildə cavablandırılıb.
Tədbirdə 70 nəfər iştirak edib.
