Yalnız Masallının deyil, bütün Azərbaycanın fəxri olan Mübariz Mənsimov şəhidin xatirəsini əbədiləşdirib. Bu haqda bu gün, 1 mart tarixində Cenublu.az xəbər verir.
İş adamı gəmilərinin birinə şəhid Xəyyam Əliyevin adını verib. "Qaraheybət" aviasiya poliqonunda təlim uçuşları zamanı helikopterin qəzaya uğraması nəticəsində şəhid olan pilot Xəyyam Əliyevin adını daşıyan gəmi Türkiyənin Yalova şəhərindəki Boğaziçi tərsanəsindən yola salınıb.
Yolasalma mərasimində "Palmali Holding"in prezidenti, xeyriyyəçi Mübariz Mənsimovun dəvəti ilə Türkiyəyə təşrif buyurmuş Xəyyam Əliyevin ailə üzvləri də iştirak ediblər. Əvvəlcə İstanbulda, şirkətin baş ofisində onları qəbul edən M. Mənsimov şəhid atası Əlixan Əliyevə gəminin adı həkk olunmuş qızıl medalları təqdim edib. O bildirib ki, özü və rəhbərlik etdiyi şirkət nə qədər yaşayırsa, şəhidlərin adlarını hər zaman uca tutacaq, onları yaşadacaq və qürurla daşıyacaq.
M.Mənsimov çıxışında bildirib ki, Dövlət Sərhəd Xidmətinin kapitanı olan Xəyyam Əliyev təqaüdə çıxandan sonra dünyanı qarış-qarış gəzməyi arzulayırmış: "Xəyyam şəhid olsa da, onun arzusu yerinə yetirildi. İndi onun adını daşıyan gəmi bütün dünyanı gəzəcək və şəhidin arzusunu yerinə yetirəcək".
