73 saylı Lənkəran şəhər seçki dairəsinin deputatı Rüfət Quliyev gediş haqlarının artmasının müsbət tərəfindən danışıb. Bu haqda məlumatı Cenublu.az bu gün, 1 fevral tarixində Pravda.az-a istinadən verir.
“Gediş haqlarının artması dünyada gedən inflyasiyanın nəticəsidir. Dövlət, Tarif Şurası mümkün qədər bu məsələni uzatdı. Amma, əfsuslar olsun ki, iqtisadiyyatın heç bir sektoru inflyasiyadan qaça bilməz. Bu, qaçılmaz bir addımdır, başa düşmək lazımdır”.
Həmçinin deputat bildirib ki, daşıyıcı şirkətlərin əksəriyyəti şəxsi şirkətlərdir: “Bu şirkətlər öz işçilərinin maaşlarını verə bilmək üçün hansısa formada qazanc əldə etməlidir. Şirkətlər gediş haqlarının artırılması ilə bağlı müraciət edirdilər ki, öz iqtisadi fəaliyyətləri nəticəsində müəyyən uğur qazansınlar. Gediş haqlarının artmasının müsbət tərəfi bu olacaq ki, nəqliyyat sektorunda daha çox effektiv işləməyə imkan yaranacaq”.
Qeyd edək ki, ötən gün Tarif Şurasının keçirilmiş iclasında gediş haqqı 10 qəpik artırılmaqla şəhərdaxili avtobus marşrutlarında 40 qəpik, şəhərətrafı və qəsəbələrarası avtobus marşrutları üzrə məsafədən asılı olaraq 0,4-1 manat təsdiq edilib. Şəhərlərarası avtobus marşrutlarında isə tarifin yuxarı həddi 1 kilometr üçün 3 qəpik səviyyəsində müəyyən olunub (əvvəlki tarif 2,4 qəpik olub).
