Masallı sakinləri qardaş Türkiyəyə göndərilən yardımları dayandırmırlar. Bu haqda bu gün, 11 fevral tarixində Cenublu.az Masallı RİH-yə istinadən xəbər verir.
Belə ki, üç gündür yığılan yardımlar könüllülər tərəfindən çeşidlənərək qablaşdırılmış və yük avtomobillərinə yığılmışdır. İlk gündən rayonda yardımlar 3 məntəqədə yığılırdısa, artıq Ərkivan qəsəbəsində yaradılmış məntəqə üzrə yığılmış yardımlar da Masallı şəhərində olan məntəqədə ümumiləşdirilərək hazır çeşidlənmiş və qablaşdırılmış şəkildə iritutumlu yük maşınına yüklənib.
Rayon sakinləri birlik nümayiş etdirərək, könüllü olaraq qardaş Türkiyə Respublikasında zəlzələdən əziyyət çəkənlər üçün isti geyimlər, qida məhsulları, xalçalar, yataq dəstləri, uşaqlar üçün vacib olan ləvazimatlar, elektrik generatorları və sobaları, eyni zamanda müxtəlif məbləğlərdə pul vəsaitlərini ianə etməkdən ötrü yaradılmış qərargaha gətiriblər.
Yardımın ilk günü 5 yük maşını Bakı şəhərinə yola salındıqdan sonra növbəti gün 1 və bu gün də 1, ümumilikdə 2 iritutumlu yük maşını Türkiyə Respublikasına yola salınmağa hazırlanmışdır.
