Masallıda meşələrin yanğından mühafizəsi mövzusunda növbəti tədbir keçirilib. Bu haqda bu gün, 21 fevral tarixində Cenublu.az Ekologiya və Təbii Sərvətlər Nazirliyinə istinadən xəbər verir.
Meşəlik ərazilərdə, əkin və biçilmiş taxıl sahələrində yanğınlara qarşı qabaqlayıcı tədbirlərin aparılmasının səmərəliliyini daha da artırmaq, eləcə də qarşılıqlı fəaliyyəti təşkil etmək məqsədilə Masallı rayonunda Ekologiya və Təbii Sərvətlər Nazirliyinin, həmçinin regional qurumların nümayəndələrinin iştirakı ilə yanğından mühafizə mövzusunda maarifləndirmə tədbiri keçirilib.
Tədbirdə təbiət əraziləri, meşəlik və yaşıllıq ərazilərdə baş verə biləcək yanğın hadisələrinə qarşı profilaktik tədbirlərin aparılmasının səmərəliliyi, yanğınların qarşısının vaxtında alınması sahəsində birgə əməkdaşlığın daha da genişləndirilməsinin əhəmiyyəti müzakirə edilib və mövzu ətrafında fikir mübadiləsi aparılıb.
Tədbirdən sonra Ekologiya və Təbii Sərvətlər Nazirliyinin rəsmilərinin, eləcə də regional qurumların əməkdaşlarının iştirakı ilə Masallı rayonunun meşə fondu torpaqlarında ağac əkini həyata keçirilib.
