Masallıda Xocalı soyqırımına həsr edilmiş şahmat turniri keçirilib. Bu haqda bu gün, 23 fevral tarixində Cenublu.az Masallı Rayon Gənclər və İdman İdarəsinə istinadən xəbər verir.
Xocalı soyqırımının otuz birinci ildönümünə həsr edilmiş şahmat turniri Masallı rayon Gənclər və İdman İdarəsinin və Uşaq-Gənclər İdman-Şahmat Məktəbinin birgə təşkilatçılığı ilə baş tutub. Turnir məktəbli oğlan və qızlar arasında keçirilib.
Masallı UGİŞM-də təşkil olunan yarışlardan əvvəl faciə qurbanlarının xatirəsi ehtiramla anılıb, məktəblilərə XX əsrin sonlarında insanlığa qarşı törədilmiş ən dəhşətli qətliam barədə məlumat verilib.
Maraqlı və gərgin mübarizə şəraitində keçən turnirin yekun nəticələrinə əsasən, ilk üç yeri tutan zəka sahibləri təşkilat komitəsinin müvafiq dərəcəli diplomları ilə mükafatlandırılıblar.
Qeyd edək ki, yarışların keçirilməsində məqsəd qan yaddaşımız olan Xocalı soyqırımı qurbanlarının xatirəsinin yad edilməsi, uşaq, yeniyetmə və gənclər arasında şahmat idman növünün kütləviliyinin artırılması, məktəblilərin sağlam həyat tərzinə istiqamətləndirilməsi, onların zərərli vərdişlərdən yayındırılması və idmançılar arasında dostluq əlaqələrinin möhkəmləndirilməsidir.
