Masallı rayon Mərkəzi Kitabxanasında gənc nəsillərə ümummilli lider Heydər Əliyev irsinin təbliğ olunması, vətənpərvərlik hissinin aşılanması və bədii ədəbiyyata maraq oyatmaq məqsədilə tədbir keçirilib. Bu haqda məlumatı Cenublu.az bu gün, 17 fevral tarixində verir.
Tədbirdə Cəlal Kazımov adına Qodman kənd tam orta məktəbinin Vll sinif şagirdləri iştirak ediblər. Çıxış edən məktəbin təşkilati məsələlər üzrə direktor müavini Bəybala Əliyev bildirib ki, Heydər Əliyevin fəaliyyəti və irsi gələcək nəsillərin kamil vətəndaş və şəxsiyyət kimi formalaşmasına örnək yaradan böyük bir məktəbdir. Hər bir Azərbaycan vətəndaşı bu məktəbi öyrənməyə borcludur. Çünki bu günümüz, işıqlı gələcəyimiz üçün dahi şəxsiyyətə borcluyuq. Ümummilli liderin dövlətimiz, xalqımız qarşısında xidmətləri misilsizdir. 2003-cü ildən bu günədək keçilən yola nəzər salsaq, ümummilli liderin siyasi kursunun uğurla davam etdiyini görərik. Dövlət başçısı İlham Əliyev bütün çıxışlarında bu çağırışı edir ki, Azərbaycan gəncliyi milli ruhda tərbiyə olunmalıdır. Heydər Əliyev irsi öyrənilməli, nəsildən-nəslə ötürülməlidir.
Kitabxananın əməkdaşları məktəblilərə kitabxananın fəaliyyəti və fonddan istifadə qaydaları haqqında məlumat veriblər. Kitabxanada müxtəlif mövzularda təşkil olunmuş sərgilərlə tanışlıq şagirdlərin xüsusi marağına səbəb olub. Sonda məktəblilər kitabxana fonduna yeni daxil olan kitablara abunə yazılıblar.
Qeyd edək ki, tədbir Masallı Rayon İcra Hakimiyyətinin təşəbbüsü, Mərkəzi Kitabxananın və Masallı Təhsil Sektorunun birgə təşkilatçılığı ilə baş tutub.
