Masallıda “Gənclərin psixoloji problemlərinin yaranmasına cəmiyyətin təsiri” mövzusunda seminar keçirilib. Bu haqda məlumatı Cenublu.az bu gün, 15 fevral tarixində verir.
Seminarda “Masallı Gənclər Evi” SXM-in psixoloqu Ramal Şükürov gənclərə psixoloji dəstəyin əhəmiyyəti, onların psixoloji vəziyyətinin və problemlərinin mənşəyinin müəyyən olunması, ruh düşkünlüyü, özünəqapanma, stres, valideynlərin və cəmiyyətin bu prosesdə rolu haqqında geniş məlumat verib.
Həmçinin hər bir gəncin uğurlu gələcəyi və karyerası üçün ona seçim azadlığının verilməsi, beynəlxalq səviyyədə aparılmış araşdırmalara əsasən, müxtəlif ölkələrdə gənclərin əldə etdikləri nailiyyətlərin müqayisəsi mövzularından da söz açılıb.
Sonda gəncləri maraqlandıran suallar cavablandırılıb, mövzu ilə bağlı sorğu keçirilib.
Qeyd edək ki, seminar “Masallı Gənclər Evi” SXM-in təşkilatçılığı, Masallı Dövlət Regional Kollecinin müəllim və tələbələrinin iştirakı ilə baş tutub.
