Masallı rayonunun bu ərazisində salınan yaşıllıq zolağı ətraf mühitə xeyirdən çox zərər verir. Bu haqda məlumatı Cenublu.az bu gün, 5 dekabr tarixində İctimai TV-yə istinadən verir.
Söhbət Masallı rayonunu yeni Ələt-Astara magistralı ilə birləşdirən yolun kənarındakı şam ağaclarından gedir.
Belə ki, bir neçə il öncə kiçik tinglər halında yüksəkgərginlikli elektrik xətlərinin altında əkilən ağaclar artıq böyüyərək bu xətlərə toxunacaq həddə çatıb.
Yolun bir istiqamətində təxminən 200 metr uzunluqda əkilmiş şam ağaclarının əksəriyyəti, demək olar ki, elektrik naqillərinə toxunur. Xüsusən də yağmurlu günlərdə bu, xoşagəlməz hadisələrin baş verməsini qaçılmaz edir.
Ağacların olduğu yolda nəqliyyat vasitələri yeni Ələt-Astara magistralına və əks-istiqamətə gün boyu intensiv hərəkət edir.
Rayon sakinləri bildirirlər ki, şam ağacları əkiləndən bəri bir dəfə də olsun budanmayıb. Elə buna görə də onlar hazırda az qala elektrik dirəkləri hündürlüyünə qalxaraq naqillərə toxunur. Bu, ağacların məhv olmasına şərait yaratmaqla yanaşı, küləkli havada naqillərin qırılması və ya qısaqapanma ilə nəticələnə bilər.
Məsələ ilə bağlı Masallı RİH-dən bildirdilər ki, vəziyyətdən xəbərsizdirlər. “Azərişıq”ın yerli nümayəndələrinin iştirakı ilə əraziyə baxış keçirilməklə problem aradan qaldırılacaq.
