Masallının Seybətin kənd sakinləri övladlarının təhsil aldığı məktəbi təmir ediblər. Bu haqda məlumatı Cenublu.az bu gün, 20 fevral tarixində Təhsil TV-yə istinadən verir.
Kənd sakinləri bildiriblər ki, məktəbin təmirində hamının köməyi olub. Ustalar belə işləməyə təmənnasız gəliblər.
Lənkəran-Astara Regional Təhsil İdarəsinin müdiri Elxan Nəcəfov: “Qısa zamanda kənd camaatının dəstəyi ilə məktəbin sinif otaqları, dəhlizləri, pəncərələri yeniləndi. İstilik sistemi çəkildi. Məktəbin istilik sisteminə qoşulması və qazla istilik sisteminin bərpa edilməsini təşkil edə bildik”.
Məktəbin direktoru Lətafət Zeynalova: “Bütün divarlar sökülmüşdü. Elektrik xətləri çox təhlükəli vəziyyətdə idi. Döşəmələr uçuq idi. Təmirdən sonra hər bir şey yeniləndi. Bunun nəticəsidir ki, bizim davamiyyətimiz yüksəlib. Başqa məktəblərə gedən şagirdlərimiz geri qayıdıblar. Dərsin keyfiyyəti yaxşılaşıb”.
