Masallı rayon Xoşçobanlı kəndində Vətən müharibəsinin şəhidi Musa Əlövsət oğlu Mustafayevin anım mərasimi keçirilib. Bu haqda məlumatı Cenublu.az bu gün, 8 oktyabr tarixində Masallı RİH-yə istinadən verir.
Anım mərasimində Masallı Rayon İcra Hakimiyyətinin başçısı Araz Əhmədov və aparatı, hüquq-mühafizə orqanlarının, YAP Masallı Rayon Təşkilatının fəalları, Şəhidin əsgər yoldaşları, qazilər, din xadimləri, şəhid ailələri və kənd sakinləri iştirak ediblər.
Öncə tədbir iştirakçıları ərazidə yeni inşa edilmiş şəhidlər abidə kompleksinin açılışını edərək ölkəmizin ərazi bütövlüyü uğrunda canından keçən qəhrəman oğulların xatirəsini bir dəqiqəlik sükutla yad ediblər.
Sonra rayon rəhbərliyi və qonaqlar şəhid Musa Mustafayevin ailəsini ziyarət edərək, ailənin qayğıları ilə maraqlanıblar.
Qeyd edək ki, Musa Mustafayev Füzuli döyüşləri zamanı şəhid olub. Ölümündən sonra “Vətən uğrunda”, “Füzulinin azad olunmasına görə” və “Cəsur döyüşçü” medalları ilə təltif olunub.
