Vaxtilə Salyan, Neftçala və ətraf rayonlarda kənd təsərrüfatının əsas sahələrindən biri olan narçılıq bu gün ciddi problemlərlə üzləşib.
Cenublu.az xəbər verir ki, təsərrüfatçıların sözlərinə görə, əvvəlki illərdə narın tədarükünə xüsusi diqqət göstərilirdi, məhsulun toplanması üçün kəndlərə yeşiklər paylanırdı. Bu isə sakinləri yeni nar bağları salmağa və mövcud təsərrüfatlara qulluq etməyə həvəsləndirirdi.
Hazırda isə vəziyyət fərqlidir. Salyandakı nar bağlarında məhsulun bir hissəsi ağacların üzərində çürüyür, digər hissəsi isə yerə tökülərək tələf olur. Şikayətçilər bildirirlər ki, nar yetişdirməkdən daha böyük problem məhsulu satmaqdır.
Onların sözlərinə görə, alıcıların və emal imkanlarının məhdud olması ciddi məhsul itkisinə səbəb olur. Nəticədə narçılıq zəifləyir, bağların sahəsi isə ildən-ilə azalır.
Sakinlər hesab edirlər ki, narçılığın əvvəlki səviyyəsinə qaytarılması üçün məhsulun tədarükü və emalını təmin edən müəssisələrin yaradılması vacibdir.
