Lerik şəhərinə və rayonun kəndlərinə hazırda yağan qarın hündürlüyü 70 sm-i keçib.
Bu barədə modern.az-a Lerik Rayon İcra Hakimiyyəti başçısının müavini - Fövqəladə Hallar Komissiyasının sədri Habil Məlikov deyib.
Komissiya sədri bildirib ki, hazırda qarın yağması davam edir:
"Dağlıq ərazilərimizdə isə qarın hündürlüyü 1 metrdən çoxdur".
İcra başçısının müavini qeyd edib ki, rayonun ümumilikdə su və qaz təminatında heç bir problem yoxdur, lakin elektrik enerjisi ilə bağlı çətinliklər mövcuddur:
"Bərpa işləri davam etdirilir. 162 yaşayış məntəqəsindən 80-də enerji bərpa edilib. Yollarla bağlı vəziyyətə gəlincə, əsas magistral yollar tam açılıb. Yol təmizləmə işləri davam etdirilir və avtomobillərin hərəkətində ciddi problem yoxdur.
Hazırda kəndlərə gediş-gəliş qismən mümkündür, təcili tibbi yardım və zəruri xidmətlərin keçidi üçün yollar nəzarətdə saxlanılır".
