“Ekoloji təmiz məhsul və aqrobiomüxtəliflik” IV Respublika müsabiqəsinin final mərhələsində lənkəranlı şagirdlər qalib statusunu qazanıblar. Bu haqda bu gün, 11 fevral tarixində Cenublu.az Respublika Uşaq-Gənclər İnkişaf Mərkəzinə istinadən xəbər verir.
Müsabiqə Azərbaycan Respublikası Ekologiya və Təbii Sərvətlər Nazirliyi və Azərbaycan Respublikası Kənd Təsərrüfatı Nazirliyinin birgə əməkdaşlığı çərçivəsində Azərbaycan Respublikası Elm və Təhsil Nazirliyinin dəstəyi ilə keçirilib. Builki müsabiqənin final mərhələsinə “Azersun Holding” şirkəti tərəfdaş olaraq qoşulmuşdur.
Subtropik bitkilər nominasiyası üzrə mübarizə aparan şagirdlərimiz hər 3 ilk pillənin qalibi olublar. Nominasiya üzrə I yerə Hüseynzadə Afət (Lənkəran), II yerə Bədəliyeva Leyla (Lənkəran), III yerə Rüstəmzadə Sunay (Lənkəran) layiq görülüblər.
Müsabiqənin məqsədi regionlar üzrə ekoloji təmiz kənd təsərrüfatının inkişafı və Azərbaycanın aqrobiomüxtəlifliyinin qorunması sahəsində məktəblilərin bilik və bacarıqlarının artırılması, ekoloji təmiz yerli mədəni bitki növlərinin becərilməsi, yerli heyvan cinslərinin qorunub saxlanması, kənd təsərrüfatı sərvətlərinin öyrənilməsi, onların istifadəsi, bərpası mühafizəsinə dair şagirdlərin maarifləndirilməsindən ibarətdir.
Müsabiqədə ümumtəhsil və internat məktəblərinin V-XI sinif şagirdləri, məktəbdənkənar təhsil müəssisələrinin dərnək üzvləri fərdi, kollektiv, sinif, ailə və ya məktəb şəklində iştirak edən 3000 nəfərdən 100 nəfər final mərhələsinə vəsiqə qazanıb və müsabiqə meyvəçilik, subtropik bitkilər, arıçılıq, heyvandarlıq, meşə məhsulları, tərəvəzçilik, gülçülük, dənli bitkilər, texniki bitkilər, “balaca fermer” (I-IV siniflər), Qarabağın biomüxtəlifliyi nominasiyaları üzrə aparılıb.
