Lənkəranda alman alim tərəfindən inşa etdirilən və yaşı bir əsrə yaxın olan su quyusunun tarixçəsinə nəzər salaq.
1928-ci ildə Xanbulan kəndinin ərazisində, Ümumittifaq Meşəçilik İnstitutunun dayaq məntəqəsi kimi yaradılan müəssisənin həyətində milliyyətcə alman olan direktor Velmud Şmidtin tapşırığı ilə quyu qazılıb.
Quyu kərpiclə hörülüb, dibliyi də xüsusi beton blok şəklində hazırlanıb. Quyunun yerində əvvəllər bulaq axıb. Sonradan içməli suya tələbat artdığı üçün quyu daha da dərinləşdirilib. Divarları qırmızı, yanmış kərpiclə hörülüb. Quyunun kərpicləri elə burada, bu kənddə bişirilib.
Sakinlərin dediyinə görə, 80-90-cı illərə qədər quyunun suyu çox gur olub. Kənddə yaşayan 24-ə yaxın ailənin isti havalarda belə suyu azalmayıb. Mütəxəssislər bunun sirrini onun xüsusi texnologiya ilə qazılmasında görürlər.
Su digər hövzələrdəkindən öz tərkibi ilə fərqlənir. Çox yüngül, şəffaf sudur.
Hazırda bu qədim quyudan 10 ailə istifadə edir, su motoru qoyulub. Məlumat üçün bildirək ki, Velmut Şmidtin nəvəsi Rusiyanın Sankt-Peterburq şəhərində yaşayır. Alimdir, 3 il əvvəl kəndə gəlib. Babasının fəaliyyəti ilə maraqlanıb. Yerli sakinlər babasını xoş sözlərlə yad edib, təşəkkürlərini bildiriblər.
