Lənkəran rayonunun Vilvan kəndində torpaq sürüşməsi baş verib. Bu haqda məlumatı Cenublu.az bu gün, 24 oktyabr tarixində Apa.az-a istinadən verir.
Torpaq sürüşməsi Lənkəranda yağan intensiv yağışların Veravul çayının daşması nəticəsində olub.
Belə ki, 10-a yaxın ailənin yaşadığı evlər üçün təhlükəli vəziyyət yaranıb. Vaxtilə 60-65 metr aralıda olan torpaq qatı sürüşərək evlərin 10 metrliyinə kimi yaxınlaşıb. Torpaq uçqunu sakinlərin təsərrüfatlarına xeyli ziyan vurub, meyvə və sitrus ağaclarını, eləcə də torpaq sahələrini, salınan istixanaları aparıb.
Ərazidə yaranan vəziyyətlə bağlı Lənkəran rayon Yuxarı Xanbulançay Hidroqovşağı İstismar İdarəsinin mütəxəssisi Ayıq Əliyev bildirib ki, idarə tərəfindən əraziyə ağır texnikalar ayrılıb. Hava şəraiti imkan verən kimi, çayda məcradəyişmə işləri aparılacaq.
Qeyd edək ki, hazırda çayda 2 km məsafədə sahilbərkitmə işləri görülür və tamamlanmaq üzrədir.
