Lənkəranın kəndlərindən birində qeyri-adi hadisə baş verib.
Cenublu.az xəbər verir ki, rayonunun Gərmətük qəsəbəsində, Akif Axundova məxsus həyətyanı sahədə 63 ildir içməli suyundan istifadə olunan 6-7 metr dərinliyi olan quyudan termal su çıxıb.
Ev sahibinin sözlərinə görə, bu ərazidə köhnə ev olub. Quyudan son günlərə kimi içməli su mənbəyi kimi istifadə olunub.
Amma 4-5 gündür ki, quyunun suyunun temperaturu kəskin artıb: “Quyunun suyu həmişə sərin, şəffaf və içməli olub. Son 3-4 gündür ki, quyudan isti su çıxır. Yaxınlıqdakı evlərin sahiblərindən maraqlanmışıq, onların quyularının suları sərindir. Amma bizim quyunun suyu istidir”.
Artıq aidiyyəti qurumun nümayəndəsi həyətdə olub, quyuya baxış keçirib və sudan nümunə götürərək müvafiq laboratoriyaya göndərib.
Cənub Regional Hidrometeorologiya Mərkəzinin texniki Əfqan Hümmətov Cenublu.az-a bildirib ki, quyudan isti suyun çıxmasının səbəbi bölgədəki sönməyən vulkanlar ola bilər.
Qeyd edək ki, bu quyudan başqa həyətdə daha iki quyu var ki, həmin quyulardan normal içməli su çıxır.
