Xəbər verdiyimiz kimi, Lənkəranda qızılca xəstəliyindən vəfat edən 3 yaşlı Uğurun qardaşı, 4 yaşlı Yunus Abızadə də eyni virusa yoluxub. Bu haqda məlumatı Cenublu.az bu gün, 19 dekabr tarixində Qafqazinfo-ya istinadən verir.
Onun babası Elçin Abızadə bildirib ki, Yunus hazırda Bakıdakı Məhəmmədi modul tipli xəstəxanasıda müalicə alır:
“Bizi yanına buraxmırlar. Təkcə anası yanındadır. Elə qızılcaya da ilk anası yoluxmuşdu. Daha sonra uşaqlara da keçdi. Hazırda ananın vəziyyəti yaxşıdır, sağalıb. Uşağın yanında o qalır. Yunusu dünən gecə xəstəxanaya yerləşdirə bildik. Qızdırması var idi. Sonrakı vəziyyətindən xəbərimiz yoxdur”.
Məsələ ilə bağlı Tibbi Ərazi Bölmələrini İdarəetmə Birliyinə (TƏBİB) sorğu ünvanlanıb.
“2019-cu il təvəllüdlü azyaşlı (cinsi kişi olan) dekabrın 18-də saat 19:30 radələrində Məhəmmədidəki modul tipli xəstəxanaya yerləşdirilib. Ona zəruri tibbi xidmətlər göstərilib, hazırda müalicəsi davam etdirilir. Vəziyyəti ağır stabildir”, – deyə qurumdan bildirilib.
