Lənkəran rayonu ərazisində genişmiqyaslı abadlıq-quruculuq işlərinə start verilib. Bu haqda məlumat Lənkəran şəhər İcra Hakimiyyətindən bu gün, 31 avqust tarixində Cenublu.az-a verilib.
Tədbirlər Planına əsasən, rayon ərazisinin yollar boyunca kol-kosdan təmizlənməsi həyata keçirilir, suaxar kanallar təmizlənir, bordürlər rənglənir, hərəkətə mane olan agacların budanması, gövdələrinin rənglənməsi həyata keçirilir və səliqə-sahman yaradılır.
Sakinlərin rahat gediş-gəlişi üçün piyada səkilərinin yenidən qurulması, küçə və yollarda hasarların rənglənməsi, üzlüklərinin dəyişdirilməsi və təmiri həyata keçirilir, sıradan çıxmış tametlər yeniləri ilə əvəzlənir.
Əhalinin daha sıx olduğu ərazilərdə əlavə yeni zibil qutularının qoyulması təmin edilir. Şəhərin bütün küçələrində və eləcə də parklarında işıqlandırma ilə bağlı nasazlıqlar aradan qaldırılır.
Parklarda və yol kənarlarında olan sıradan çıxmış dəmir məhəccərlər sökülərək təmir edilir və rənglənir, təmiri mümkün olmayanlar yeniləri ilə dəyişdirilir.
Növbəti günlərdə hava şəraitinə uyğun olaraq, rayonun küçə və yollarının asfalt örtüyünün yenilənməsi, güclü yağış nəticəsində yollarda yaranan çökəklik və çuxurların təmiri, habelə zərurət olan küçələrdə piyada zolaqlarının çəkilməsi, yeniləri ilə əvəzlənməsi və yol nişanlarının qoyulması təmin ediləcək.
Qeyd edək ki, ümumrayon iməciliyi rayonun bütün xidmət idarələri əməkdaşlarının birgə iştirakı ilə 10 gün davam edəcək.
